Урад зацвердзіў канцэпцыю развіцця інжынернай адукацыі да 2035 года

Урад зацвердзіў канцэпцыю развіцця інжынернай адукацыі ў Беларусі на перыяд да 2035 года. Адпаведную пастанову падпісаў прэм'ер-міністр Беларусі Аляксандр Турчын, паведамляе БЕЛТА са спасылкай на прэс-службу ўрада.

Дакумент распрацаваны ў мэтах развіцця інжынернай адукацыі, павышэння якасці падрыхтоўкі інжынерных кадраў і гарантавання тэхналагічнай бяспекі Беларусі.

Пастановай прадугледжваецца мадэрнізацыя адукацыйнага асяроддзя, удасканаленне зместу адукацыі і адукацыйных тэхналогій, павышэнне эфектыўнасці выкладчыцкай дзейнасці, папулярызацыя прафесіі інжынерна-тэхнічнага работніка.

Канцэпцыяй таксама прадугледжана стварэнне на базе ВНУ цэнтраў кампетэнцый, у тым ліку закупка сучаснага высокатэхналагічнага абсталявання, для забеспячэння апераджальнай падрыхтоўкі спецыялістаў па інжынерных спецыяльнасцях з улікам патрэбнасцей арганізацый - заказчыкаў кадраў.

Рэалізацыя канцэпцыі будзе садзейнічаць павышэнню эфектыўнасці вытворчай практыкі, уключэнню ў праграмы ВНУ дысцыплін пад патрэбнасці прадпрыемстваў рэальнага сектара эканомікі, а таксама пашырэнню падрыхтоўкі інжынерных кадраў па міждысцыплінарных спецыяльнасцях, якія ў тым ліку прымяняюць тэхналогіі штучнага інтэлекту, машыннага навучання, лічбавых двайнікоў, квантавых вылічэнняў, уключэнню арганізацый - заказчыкаў кадраў у падрыхтоўку такіх спецыялістаў.

Пастанова ўступае ў сілу з дня яе прыняцця.